کپل شرما کے بعد سنیل گروور بھی نئے پروگرام کے ساتھ دھوم مچانے کو تیار

ممبئی(اے ٹی ایم نیوز آن لائن) معروف کامیڈین واداکار سنیل گروور نے ایک بار پھر چھوٹی اسکرین پر واپسی کا فیصلہ کیا ہے اور وہ جلد ایک پروگرام میں دکھائی دیں گے۔
بھارت کے کامیاب ترین کامیڈی پروگرام ’دی کپل شرما شو‘ میں ڈاکٹر گلاٹی کے کردار سے شہرت کی بلندیوں پر پہنچنے والے کامیڈین سنیل گروور ان دنوں بالی ووڈ سلطان سلمان خان کے ساتھ فلم ’بھارت’ کی شوٹنگ میں مصروف ہیں لیکن ان کی اصل پہچان چھوٹی اسکرین ہی ہے جسے وہ چھوڑنا نہیں چاہتے یہی وجہ ہے کہ کامیڈین نے ایک بار پھر چھوٹی اسکرین پر واپسی کا فیصلہ کیا ہے۔
بھارتی میڈیا رپورٹس کے مطابق سنیل گروور فلم ’بھارت‘ کی شوٹنگ مکمل کرتے ہی ایک نئے پروگرام کے ساتھ چھوٹی اسکرین پر واپس آرہے ہیں اور اس حوالے سے ان کا نجی ٹی وی سے معاہدہ بھی ہوگیا ہے، یہ ایک منی سیریز ہوگی جس میں پہلے مرحلے میں 14 پروگرامز ویک اینڈ پر نشر ہوں گے، معروف کامیڈین سدیش لہری بھی سنیل گروور کے ہمراہ مداحوں کے چہروں پر مسکراہٹیں بکھریں گے۔