شاہ محمود قریشی سے آسٹرین سفیر کی الوداعی ملاقات

اسلام آباد (اے ٹی ایم نیوز آن لائن) آسٹریا کی سفیر ڈاکٹر بریگیٹ بلہا کی وزارت خارجہ آمد ہوئی جہاں ان سے وزیر خارجہ شاہ محمود قریشی نے ملاقات کی۔ دفتر خارجہ کے سماجی رابطوں کی ویب سائٹ ٹویٹر پر ٹویٹ کے مطابق آسٹریا کی سفیر ڈاکٹر بریگیٹ بلہا وزارت خارجہ پہنچیں۔ وزیر خارجہ شاہ محمودقریشی سے ان کی الوداعی ملاقات ہوئی۔ ملاقات میں دو طرفہ تعلقات سمیت باہمی دلچسپی کے امور پر تبادلہ خیال کیا گیا۔


وزیر خارجہ شاہ محمود قریشی کا کہنا تھا کہ دونوں ملکوں کے خوشگوار اور دوستانہ تعلقات ہیں۔ دو طرفہ تجارتی سرگرمیوں کو مزید بڑھانے کی ضرورت ہے۔ آسٹرین سفیر کا کہنا تھا کہ پاکستان سے دو طرفہ تعلقات کو فروغ دینے کے لیے تعاون کو تیار ہیں۔شاہ محمود قریشی نے دو طرفہ تعلقات میں بہتری کے لیے ڈاکٹر بریگیٹ کی خدمات کو بھی سراہا۔